ዝሙት አደጋዎቹ እና መጠበቂያ መንገዶች

ዝሙት አደጋዎቹ እና መጠበቂያ መንገዶች

① ዝሙት የአላህን ቁጣ ያስከትላል።
ነብዩ ሶለላሁ ዐለይሂ ወሰለም እንዲህ ብለዋል:–
«يا أمةَ محمدٍ، واللهِ إنه لا أحدَ أغيرُ من اللهِ أن يزنيَ عبدُه أو تزنيَ أَمَتُه، يا أمةَ محمدٍ، والله لو تعلمون ما أعلمُ لضحِكتُم قليلاً ولبكيتُم كثيراً».
"እናንተ የሙሐመድ ህዝቦች ሆይ! ወላሂ አንድ ባሪያ በሚዘሙት ወይም አንዲት ባሪያው በምትዝሙበት ጊዜ እንደ አላህ የሚቀና የለም። እናንተ የሙሐመድ ህዝቦች ሆይ! ወላሂ እኔ የማውቀውን ብታውቁ ኖሮ ጥቂትን በሳቃችሁና ብዙ ባለቀሳችሁ ነበር።" [ቡኻሪና ሙስሊም]
② ዝሙት እጅግ ሰቅጣጭ ዱንያዊ ቅጣት የተወሰነበት ወንጀል ነው። አላህ እንዲህ ይላል:–
﴿الزَّانِيَةُ وَالزَّانِي فَاجْلِدُوا كُلَّ وَاحِدٍ مِنْهُمَا مِائَةَ جَلْدَةٍ وَلا تَأْخُذْكُمْ بِهِمَا رَأْفَةٌ فِي دِينِ اللهِ إِنْ كُنْتُمْ تُؤْمِنُونَ بِاللهِ وَالْيَوْمِ الآخِرِ وَلْيَشْهَدْ عَذَابَهُمَا طَائِفَةٌ مِنَ الْمُؤْمِنِينَ﴾
"ዝሙተኛይቱና ዝሙተኛው ከሁለቱ እያንዳንዳቸውን (ያላገቡ ከሆኑ) መቶ ግርፋትን ግረፉዋቸው፤ በእነርሱም በአላህ ፍርድ ርህራሄ አትያዛችሁ፡፡ በአላህና በመጨረሻው ቀን የምታምኑ እንደሆናችሁ (አትራሩ)፡፡ ቅጣታቸውንም ከምእምናን ጭፍሮች ይገኙበት፡፡" [አንኑር: 2]
የርህራሄ ተምሳሌት ከሆነችው ከእናትም በላይ አዛኝ የሆነው ጌታ ከባድ ቅጣት ከማስተላለፉም በላይ ቅጣቱን የሚፈፅሙት ርህራሄ እንዳይዛቸው ማሳሰቡ የወንጀሉን ከባድነት ነው አጉልቶ የሚያሳየን። በዚያ ላይ ቅጣቱ ለሌሎች መቀጣጫ ይሆን ዘንድ ከፊል ህዝብ እንዲመለከተው እያስታወሰ ነው።
ይሄ መቶ ግርፋት እንግዲህ ዝሙተኛው አግብቶ የማያውቅ ከሆነ ነው። አግብቶ የሚያውቅ ከሆነ ግን በድንጋይ ተወግሮ ነው የሚገደለው።
እነዚህ ዱንያዊ ቅጣቶች ናቸው። ጥፋቱን ፈፅሞ ሳይቶብት የሞተ ሰው የሚኖረው አኺራዊ ቅጣቱ ደግሞ የከፋ ነው የሚሆነው።
③ ዝሙት በቀብር (የበርዘኽ ህይወት) አስፈሪ ቅጣት ያለበት ጥፋት ነው። ነብዩ ሶለላሁ ዐለይሂ ወሰለም እንዲህ ብለዋል:–
«رأيتُ الليلةَ رجلين أتياني فأخرَجاني، فانطلقتُ معهما فإذا أنا ببناءٍ على مثلِ التنُّورِ، أعلاه ضيِّقٌ وأسفله واسعٌ، يوقد تحتَه نارٌ، فيه رجالٌ ونساءٌ عراةٌ، فإذا أُوقدت النارُ ارتفعوا حتى يكادوا يخرجون، وإذا خمَدَت رجعوا، فقلتُ للرَّجُلينِ: من هؤلاء؟ قالا: هم الزناةُ»
"ዛሬ ሌሊት ሁለት ሰዎች ወደኔ መጥተው አየሁኝ። ይዘውኝ ወጡ። ከነሱ ጋር ተጓዝኩ። እንደ ምድጃ ባለ ግንብ ዘንድ ደረስኩ። ላዩ ጠባብ ታቹ ሰፊ ነው። ከስሩ እሳት ይቀጣጠላል። በውስጡ እርቃን የሆኑ ወንዶችና ሴቶች አሉ። እሳቱ ሲቀጣጠል ሊወጡ እስከሚቀርቡ ወደላይ ይወጣሉ። ሲከስም ይመለሳሉ። ‘እነማን ናቸው እነዚህ?’ ብየ ሁለቱን ሰዎች ስጠይቅ ‘ዝመተኞች ናቸው’ ይላሉ።" [ቡኻሪ: 7047]
④ ዝሙት በአኺራ ድርብርብ ቅጣት ከተዛተባቸው ሺርክና ሰው መግደል ጋር አብሮ የተጠቀሰ የወንጀል አይነቶች ነው። አላህ እንዲህ ይላል:–
(وَالَّذِينَ لَا يَدْعُونَ مَعَ اللَّهِ إِلَٰهًا آخَرَ وَلَا يَقْتُلُونَ النَّفْسَ الَّتِي حَرَّمَ اللَّهُ إِلَّا بِالْحَقِّ وَلَا يَزْنُونَ ۚ وَمَنْ يَفْعَلْ ذَٰلِكَ يَلْقَ أَثَامًا * يُضَاعَفْ لَهُ الْعَذَابُ يَوْمَ الْقِيَامَةِ وَيَخْلُدْ فِيهِ مُهَانًا)
"እነዚያም ከአላህ ጋር ሌላን አምላክ የማይገዙት፣ ያችንም አላህ እርም ያደረጋትን ነፍስ ያለ ሕግ የማይገድሉት፣ የማያመነዝሩትም ናቸው፡፡ ይህንንም የሚሠራ ሰው ቅጣትን ያገኛል፡፡ በትንሣኤ ቀን ቅጣቱ ለእርሱ ይደራረባል፡፡ በእርሱም ውስጥ የተዋረደ ኾኖ ይኖራል፡፡" [አልፉርቃን: 68–69]
ኢማሙ አሕመድ "ከግድያ ቀጥሎ ከዝሙት የከፋ ወንጀል አላውቅም" ይላሉ።
⑤ ዝሙት ከባድ ማስጠንቀቂያ የመጣበት የባለጌዎች መንገድ ነው። አላህ እንዲህ ይላል:–
﴿وَلا تَقْرَبُوا الزِّنَى إِنَّهُ كَانَ فَاحِشَةً وَسَاءَ سَبِيلاً﴾
"ዝሙትንም አትቅረቡ፡፡ እርሱ በእርግጥ ብልግና ነውና፡፡ መንገድነቱም ከፋ!" [ኢስራእ: 32]
⑥ ዝሙት ኢማንን የሚያራቁት አደገኛ ወንጀል ነው። ነብዩ ሶለላሁ ዐለይሂ ወሰለም እንዲህ ብለዋል:–
«لا يزني الزاني حين يزني وهو مؤمنٌ»
"ዝሙት በሚፈፅመው ጊዜ ሙእሚን ሆኖ አይፈፅመውም።" [ቡኻሪና ሙስሊም]
ይሄ እጅግ እጅግ አስፈሪ ሐዲሥ ነው።
⑦ በዱንያም የአላህን ቁጣና ቅጣት ያስከትላል። ነብዩ ሶለላሁ ዐለይሂ ወሰለም እንዲህ ብለዋል:–
إذا ظهر الزنا و الربا في قرية فقد أحلوا بأنفسهم عذاب الله
"ዝሙትና ወለድ በአንዲት መንደር ላይ ከተንሰራፋ በራሳቸው ላይ የአላህን ቅጣት አስወስነዋል።"
⑧ ዝሙት ሲበዛ በሐዲሥ እንደተገለፀው ቀድሞ የማይታወቅ በሽታና ወረርሺኝ ይመጣል። ለምሳሌ ኤድስን አስታውሱ።
…………

…ከዝሙት መራቂያ መንገዶች…
① በመጀመሪያ አንተ ቁርጠኛ ውሳኔ ላይ ድረስ። ከልብ ካለቀሱ እንባ አይገድም።
② እይታን መገደብ። "አይኖች ይዘሙታሉ። ዝሙታቸው ያልተፈቀደ እይታ ነው" ተብሏል በሐዲሥ።
③ ከአጅነቢ ጋር ከመቀላቀል፣ ከአጅነቢ ጋር ተገልሎ ከመቀመጥ መራቅ። አንድ ወንድ ከአንዲት ሴት ጋር ለብቻ መሆኑ ብልግና የመፈፀሙን እድል በጣም ከፍ ያደርገዋል።
"አንድ ወንድ ከአንዲት ሴት ጋር አይገለል። ይህ ሲሆን ሶስተኛቸው ሸይጧን ነውና" ተብሏል በሐዲሥ። ሰው በሌለበት የባልሽ ወንድም እንዲገባ አታድርጊ። "ዋርሳ (የባል ወንድም) ሞት ነው" ብለዋል ነብዩ ሶለላሁ ዐለይሂ ወሰለመወ።
④ ከመጥፎ ጓደኞች መራቅ
"እግሮች ይዘሙታሉ። ዝሙታቸው (ወዳልባሌ ቦታ) መሄድ ነው" ተብሏል በሐዲሥ።
⑤ አጅነቢ ከመጨበጥ መቆጠብ
"እጆች ይዘሙታሉ። ዝሙታቸው መንካት/ መጨበጥ ነው" ተብሏል በሐዲሥ።
⑥ ምላሳችንን ዝሙትን ከሚያስታወሱ ነገሮች ማራቅ። በሐዲሥ "ምላስም ይዘሙታል" እንደተባለ እናስታውስ።
⑦ እንደ ሙዚቃ፣ ፊልም፣ ልቦለድ፣ እርቃን ምስሎችና የብልግና ቪዲዮዎች በከባዱ ወደ ዝሙት የሚጣሩና የዝሙት ፍላጎትን የሚቀሰቅሱ ስራዎች ናቸው። አብዛኞቹ ዘፈኖች ስለ አጅነቢ ገላ፣ ከአጅነቢ ጋር ስለመጫወትና መዋል ነው የሚያወሩት። ዘፈን የዝሙት መሰላል፣ የንፍቅና መብቀያ ነው። አብዛኞቹ ፊልሞች የዝሙት ሙቀዲማዎች ይገኙባቸዋል።
⑧ አኺራን ማሰብ፣ ነገ ከአላህ ፊት መቆምና ከባድ ምርመራ እንዳለ ማሰብ። አላህ እንዲህ ይላል:–
(يَوْمَ تَشْهَدُ عَلَيْهِمْ أَلْسِنَتُهُمْ وَأَيْدِيهِمْ وَأَرْجُلُهُمْ بِمَا كَانُوا يَعْمَلُونَ)
"በእነሱ ላይ ምላሶቻቸው፣ እጆቻቸውና እግሮቻቸውም ይሠሩት በነበሩት ነገር በሚመሰክሩባቸው ቀን (ከባድ ቅጣት አላቸው)፡፡" [አንኑር: 24]
⑨ እራስን በሐላል ማብቃቃት (ማግባት)። ለቻለ ሰው እንደ ትዳር ከዝሙት መጥጠበቂያ ሰበብ የለም።
(10) ማግባት ያልሆነለት ደግሞ እስከዚያ ፆም ማብዛት። አመጋገብን ማስተካከል። እራስን ከቦዘኔነት አርቆ በስራ መጥመድ።
(11) ስለዝሙት አደገኝነት፣ ከዝሙት መራቅ አላህ ዘንድ ስላለው ደረጃ ማንበብ፣ ማድመጥ፣ ማስታወስ።

(Ibnu Munewor ፣ መጋቢት 19/2010)